Trajneri Ralf Hasenhutl deklaroi se do t’ia bëjë të qartë pronarëve të rinj të Sauthemptonit se e do Armando Brojën në ekip përtej fundit të sezonit.
Tekniku austriak u shpreh se sulmuesit kuqezi i pëlqen që të qëndrojë te “Shenjtorët”.
20-vjeçari i huazuar nga Çelsi realizoi në takimin kundër Brentfordit golin e pestë në Premier Ligë dhe të shtatin sezonal, duke ndihmuar Sauthemptoninqë të fitojë 4-1 kundër Brentfordit. Në bazë të marrëveshjes mes klubeve, në fund të sezonit, Broja duhet që të kthehet në “Stamford Bridge”.
“Atij i pëlqen që të qëndrojë këtu, e dashuron këtë ekip. Do të ishte fantastike nëse do të bëhej një futbollist i yni. Mendoj se do që të rrijë me ne. Arrin ta perceptosh në çdo moment. Edhe tifozët e duan, kjo është gjë e mirë”.
Në tribunën e stadiumit “St Mary’ në fitoren ndaj Brentfordit, ishte edhe pronari i kompanisë “Sport Republic”, Dragan Solak.
Miliarderi serb ka për qëllim që të sjellë lojtarë të talentuar në ekip dhe mesazhi i teknikut austriak është i qartë; ai e do Brojën edhe në sezonin në vazhdim.
