Shkon në 3 numri i futbollistëve shqiptarë që do të jenë pjesë e Legias së Varshavës këtë sezon. Pas Ernest Muçit dhe Jurgen Çelhakës, Lirim Kastrati është shqiptari i radhës që bashkohet me klubin e madh polak.
Sulmuesi 22-vjeçar i formuar te Shkëndija e Tiranës, do të nisë një aventurë të re në karrierën e tij, teksa fillimisht do të kalojë në formë huazimi nga Dinamo e Zagrebit te Legia e Varshavës.
Klubi kroat ka në pronësi kartonin e shqiptarit të Kosovës, i cili do të firmosi ditën e sotme kontratën e re. Bëhet me dije se Kastrati nuk do të udhëtojë me Kosovën në Gjeorgji për kualifikueset e Botërorit, pasi është nisur drejt Polonisë për vizitat mjekësore.
