Vedat Muriqi ka kompletuar huazimin tek skuadra spanjolle Mallorca nga Lazio.
Sulmuesi kosovar do të qëndrojë për gjashtë muaj te Mallorca si huazim, me klubin spanjoll që ka të drejtën e blerjes në fund të sezonit.
Megjithatë shteti spanjoll dhe La Liga vazhdojnë të kenë qasje skandaloze karshi Kosovës.
Faqja zyrtare e La Ligas nuk i kanë vendosur flamurin e Kosovës sulmuesit prizrenas, shkruan Gazeta Olle.
La Liga ia ka vendosur flamurin e Shqipërisë sulmuesit shtatlartë.
27-vjeçari ka dy pasaporta, të Shqipërisë dhe Kosovës, por përkundër që është një reprezentues kosovar, La Liga ia vendos flamurin e Shqipërisë.
Kjo nuk është hera e parë, që në Spanjë krijohen të tilla situate. Kujtojmë që kur Kosova u ndesh me Spanjën, ndodhën shumë incidente të shëmtuara në lidhje me flamurin e Kosovës.
Dardanët ishin në grup me Spanjën në kuadër të kualifikueseve për Botëror. Në dy ndeshjet që u zhvilluan, Spanja vazhdimisht e injoronte Kosovën duke e shmangur emrin dhe simbolet. Madje, në ndeshjen e parë, Spanja iu referua Kosovës si “territori i Kosovës”.
Gjithsesi tani është topi te Muriqi ku shpresojmë që me gola të shumtë do t’ia tregojë spanjollëve prejardhjen e tij dhe flamurin e bukur të Kosovës.
/Gazeta Olle/
