Drita ka marrë një fitore të madhe ndaj Dukagjinit të Klinës me rezultat të thellë 4-0.
Arbnor Muja ishte fantastik në këtë takim me dy gola të shënuar, por një tjetër futbollist shkëlqeu në këtë sfidë për gjilanasit.
Mesfushori i talentuar nga Kaçaniku, Albin Krasniqi ka marrë për herë të parë besimin e Ardian Nuhiut për të luajtur nga minuta e parë.
20-vjeçari e shpagoi në mënyrën më të mirë besimin e Nuhiut, duke bërë një ndeshje të madhe ndaj klinasve.
Krasniqi fitoi penalltinë në pjesën e parë, derisa asistoi në golin e dytë të Arbnor Mujës, shkruan Gazeta Olle.
Për Krasniqin kjo ishte ndeshja e tretë këtë edicion, pasi kishte luajtur 16 minuta ndaj Feronikelit dhe nëntë minuta ndaj Drenicës.
Sigurisht që forma e mirë e treguar nga Krasniqi është një lajm i mirë për trajnerin Ardian Nuhiu, që tani ka një armë më shumë në mesfushë për pjesën tjetër të kampionatit.
Duke parë moshën e re dhe formën e mirë, Krasniqi mund të jetë një alternativë shumë e mirë edhe për Përfaqësuesen U21 të Kosovës.
Mbetet të shihet nëse trajneri Nuhiu është bindur nga ndeshja e mirë e Krasniqit dhe do ta aktivizojë atë edhe në derbin ndaj Prishtinës. /Gazeta Olle/
