Reagimi i FC Shkupit pas ndodhive të djeshme në Tetovë: Asnjë rivalitet nuk mund të tejkalojë miqësinë dhe vëllazërinë

Të dielën në stadiumin e qytetit të Tetovës u zhvillua derbi shqiptarë midis Shkëndijës dhe FC Shkupit. Edhe pse pritej një festë e vërtetë në këtë super përballje, një gjë e tillë nuk ndodhi, pasi ndeshja në fjalë në disa raste u ndërpre për shkak hudhjes së gjësendëve të ndryshme në fushën e futbollit, ndërsa në disa raste kishte edhe konfrontime mes futbollistëve.

Lexo po ashtu:

Të gjitha ngjarjet që karakterizuan ndeshjen Shkëndija 0-0 Shkupi

Mbi të gjitha në këtë ndeshje u godit edhe arbitri anësor, mirëpo edhe përkundër gjithë këtyre ndodhive, ndeshja nuk u ndërpre, përkundrazi u zhvillua për plotë 120 minuta, duke marrë parasysh edhe lojën shtesë, e ku rezultati mbeti ai i fillimit 0:0.

Vlen të theksohet se Shkëndija në minutën e 96-të pati një mundësi të mirë që përmes penaltisë të kalonte në avantazh, mirëpo goditjen e Lupçe Doriev e ndali portieri Artan Iljazi.

Pas gjithë këtyre ndodhive në Tetovë, sot përmes një kumtesë ka reaguar edhe klubi shkupjan, i cili kishte pritur një tjetër respekt nga vëllezërit e tyre shqiptarë, duke aluduar në gardën e nderit që u kishin bërë futbollistëve të Shkëndijës si në Shkup, ashtu edhe në Tetovë, kur këta të fundit shpalleshin kampion, por se një gjë e tillë nuk ndodhi edhe këtë herë nga ana e kundërt.

Mirëpo pavarësisht gjithë kësaj, ata thonë se “Asnjë rivalitet nuk mund të tejkalojë miqësinë dhe vllazërinë”.

Më poshtë mund të lexoni edhe reagimin e plotë të FC Shkupit:

RESPEKTI DHE DALLIMI I KLUBIT TË MADH DHE ATIJ TË VOGËL

Në ndeshjen e luajtur mbrëmë u regjistrua një ngjarje e turpshme dhe e rëndë për futbollin. Ne nuk ndjejmë asnjë lloj mllefi ndaj tifozëve si rezultat të ngjarjeve që ndodhën mbrëmë. Mllefi ynë është drejtuar ndaj mentalitetit të menaxhmentit, që i drejtoi tifozët në këtë ngjarje të keqe. Ky lloj mentaliteti duhet ta ketë të qartë se nëse duan armik nuk mund të gjejnë armik më të keq se neve. Nëse duan ashtu, ok, neve na leverdis. Por, a është në rregull? Opinioni e ka të qartë se një gjë e tillë nuk është në rregull dhe se nuk duhet të jetë ashtu. Karakteristika më e mirë e sportit është bashkimi, përfshirë vllazërinë dhe paqen. Falë veprimit të arsyeshëm të futbollistëve tanë dhe stafit teknik, ndeshja e mbrëmjes së kaluar u luajt deri në fund. Gjatë kohës së ngjarjeve, ekipi drejtues i njoftoi lojëtarët dhe stafin teknik se nëse duan mund të tërhiqen nga terreni. Megjithatë, lojëtarët dhe stafi teknik treguan një karakter të shkëlqyer dhe thanë se në këtë fazë nuk frikësohen prej askujt, se kanë ardhur të luajnë futboll dhe se do të luajnë futboll. Duam të falënderojmë lojëtarët tanë dhe stafin teknik për qëndrimin e tyre dhe mendimin e drejtë. Asnjëherë nuk do të jemi vegël në këtë ambient kaotik të imponuar me mentalitetin e rrezikshëm. Asnjëherë nuk do të përdorim futbollin si një vegël për këtë gjë. Ambiciet dhe paaftësia e individëve të caktuar nuk do të mjaftojnë që të krijohet ndarje midis vëllezërve. Le të dinë se asnjëherë nuk do të lejojmë që vëllai të lëndojë vëllanë. U shprehim mirënjohje tifozëve tanë. Ishte një pamje e mrekullueshme ajo e pritjes së lojëtarëve të mëdhenj të ekipit të madh me entuziazëm nga ana e tifozëve të mëdhenj dhe tifozët tanë e përqafuan ekipin e tyre. Ne jemi akoma më të mëdhenj me tifozët tanë. Madhësia nuk matet me para. Ata që duan të shohin madhësinë e drejtë, le të shikojnë se si lojëtarët e Klubit të futbollit Shkupi i duartrokitën kundërshtarin kur vitin e kaluar doli në terren ekipi i Shkëndisë. Nuk do të lejojmë që analfabetizmi dhe mentaliteti i keq të përçajnë dy ekipe vëllazërore. Asnjë rivalitet nuk mund të tejkalojë miqësinë dhe vllazërinë.

Altin Merlaku flet për dy finalet e fundit që e presin Dukagjinin

FC Drita për herë të katërt në Evropë, flet drejtori i saj, Feti Murseli