Ramiz Krasniqi grumbullon Dardanët U19

Kombëtarja U19 është grumbulluar në kamp disaditor në kuadër të përgatitjeve për ndeshjet kualifikuese për Evropianin 2023, që do të mbahen prej 17 deri më 23 nëntor në Suedi.

Përzgjedhësi Ramiz Krasniqi ka në dispozicion po thuajse të gjithë futbollistët që synon t’i ketë në ndeshjet kualifikuese, teksa në kuadër të këtij kampi do t’i luajë dy ndeshje testuese me skuadrat e Ligës së Parë, Drenasin dhe 2 Korrikun.

Krasniqi është shprehur i kënaqur që ftesës së tij i janë përgjigjur po thuajse të gjithë futbollistët.

“Ky është një grumbullim në datat e lira nga UEFA e FIFA. Shumica e futbollistëve nga Diaspora i janë përgjigjur ftesës, përjashto dy lojtarë dhe jam shumë i kënaqur që kam mundësinë të punojë me ekip të kompletuar. Ekziston motivi i madh tek lojtarët për ta përfaqësuar shtetin e vet në ndeshjet kualifikuese. Ky grumbullim është një test po thuajse i fundit para kualifikueseve, ku do të kemi edhe dy ndeshje miqësore. Në këto ndeshje do ta shohim formën e këtyre futbollistëve, sidomos të këtyre të Diasporës, me të cilët nuk jemi parë që nga muaji prill. Ky grup është shumë më kompakt se ai i vitit të kaluar dhe shpresoj se do të bëjmë një rezultat sa më të mirë në kualifikime”, ka theksuar Krasniqi.

Kosova në kualifikimet e muajit nëntor bën pjesë në Grupin 3, së bashku me Ukrainën, Qipron dhe Suedinë, si nikoqire e ndeshjeve kualifikuese.

Ish-trajneri i Shkëndijës së Tetovës firmos në Arabinë Saudite

Kosova U21 fillon përgatitjet në Antalya nën urdhrat e Afrim Tovërlanit