Përzgjedhësi i Kosovës në futsall, Arben Simitçiu e vlerëson lartë paraqitjen e lojtarëve të tij në dy ndeshje me Holandën

Përzgjedhësi i Kosovës, Arben Simitçiu, ka folur pas dy miqësoreve ndaj Holandës.

Ai i cilësoi këto dy miqësore në Zeist si shumë të rëndësishme për zhvillimin e mëtejmë të ekipit të tij, derisa paraqitjen e lojtarëve e vlerësoi me nota të larta.

“Këto miqësore kanë qenë të mirëseardhura për ne. I kemi provuar të gjitha gjërat që i kemi planifikuar dhe lojtarët i kanë aplikuar detyrat që i kemi dhënë gjatë këtij kampi. Mendoj se jemi në rrugë të mirë dhe ardhmja jonë në futsall do të jetë  e shndritshme”.

“Sa i përket ndeshjes së sotme ishim më të mirë se sa kundërshtari në të gjitha statistikat, përveç rezultatit, por thjesht fati nuk ishte me ne”.

“Natyrisht se në lojën tonë pati ndikim edhe largimi i kapitenit, por edhe mosshfrytëzimi i rasteve të shumta. Në anën tjetër, ata realizuan prej disa gjysmërasteve”.

“Sidoqoftë, në zhveshtore i përgëzova lojtarët për paraqitjen e tyre sepse brenda 24 orëve kemi luajtur dy ndeshje me intensitet tejet të lartë dhe kemi bërë futsall evropian”, ka theksuar Simitçiu.

Këto dy miqësore në Holandë do t’i shërbejnë Dardanëve që të përgatiten sa më mirë për sfidat e ardhshme në ciklet kualifikuese.