Mediat në Shqipëri shkruajnë se Dinamo ka bërë një tjetër goditje të rëndësishme në afatin e janarit, duke forcuar mesfushën me brazilianin Denison Silva, i cili luajti te Drenica.
Me këtë lojtar ishte arritur akordi, por situata para firmosjes së kontratës u vështirësua për shkak se Denison nuk kishte marrë ende dokumentacionin nga Drenica në Kosovë, ku ka luajtur së fundi.
Tashmë gjithçka është zgjidhur në këtë drejtim nga ana e brazilianit, sipas Panorama sport.
Ai ka bërë zgjidhje të njëanshme të kontratës me Drenicën, sipas procedurave përkatëse, duke qenë se kishte disa muaj pa u paguar.
Gazeta mëson se Denison ka firmosur për një vit e gjysmë me Dinamon dhe mendohet të jetë një “armë” plus në gjysmën e dytë të këtij sezoni dhe sezonin tjetër me karakteristikat që ka.
Bledar Devolli, ndihmëstrajneri i Dinamos prej pak kohësh, e njeh mirë këtë futbollist që nga koha kur ka drejtuar Drenicën. Ai dhe drejtuesit e tjerë blu janë të bindur se kanë bërë një përforcim me vlera.
Denison, 24 vjeç, luan thuajse në të gjitha pozicionet në mesfushë, qoftë në krahë dhe pas sulmuesit kryesor.
