Mallorca ka reaguar të dielën lidhur me një veprim racist të një tifozi të saj pas golit të shënuar nga Aurelien Tchouameni.
Skuadra e Vedat Muriqit ka dënuar veprimin racist të bërë nga një tifoz i ri, e që u kap nga kamerat.
Veprimi ndodhi derisa Tchouameni po festonte golin që e shënoi për Real Madridin. Me golin e tij Real Madridi fitoi 1:0 në udhëtim ndaj Mallorcas, të shtunën mbrëma.
Sipas “Marca”, tifozi duket të jetë i mitur, ndërsa ai bëri disa gjeste të majmunit, ndërsa lojtarët e Real Madridit po festonin. Ishte një tjetër episod i racizmit në futbollin spanjoll. I njëjti tifoz hodhi edhe një shishe uji në fushë.
“Në ndeshjen e djeshme u identifikuan pamje ku një person bën gjeste raciste. Klubi ka aktivizuar protokollin kundër dhunës në futboll dhe po bashkëpunon me policinë për identifikimin e personit në fjalë. Mallorca nuk toleron dhe nuk do të tolerojë asnjë shfaqje raciste dhe merrr pjesë aktive në të gjithë fushatat për çrrënjosjen e kësaj plage që shkon përtej sportit. Ky është një rast i izoluar që nuk njollos respektin dhe sjelljen sportive të tifozëve tanë”, ka shkruar Mallorca në reagim.
