Luis Enrique është një ekspert në ‘Fantasy La Liga’, ai zbulon formacionin me Vedat Muriqin në krye të sulmit

Luis Enrique është një nga trajnerët më të mirë në botë padyshim, por edhe më i dashuri nga tifozët e futbollit pasi ai ka komunikim të vazhdueshëm me ta.

Trajneri i Përfaqësueses spanjolle shpesh herë futet ‘live’ në ‘Twitch’ për të biseduar me tifozët rreth temave të ndryshme.

Ai i tregoi tifozëve se është një përdorues i rregullt i ‘Fantasy La Liga’, madje nuk ngurroi për t’i treguar edhe lojtarët që ka në formacion.

“Është një moment i mrekullueshëm për të folur për këtë sepse unë jam duke udhëhequr, tregojuni atyre se çfarë ekipi të madh kam”, i tha Enrique  trajnerit fizik Rafael Pol që e kishte mysafir në ‘Twitch’.

Por duket se forma fantastike e Vedat Muriqit në La Liga nuk ka shkuar pa u vënë re nga Luis Enrique me tetë golat në 12 ndeshje nga sulmuesi kosovar.

Trajneri i ‘La Roya’ në formacionin e tij ka përfshirë Muriqin pasi përpos sulmuesit prizrenas në sulm ka edhe Iago Aspas, Robert Lewandowskin dhe anësorin e Real Madrid, Rodrygo.

Ndërkohë sa i përket trajnerit, Enrique ka në ekipin e tij mikun dhe ish-bashkëlojtarin, Xavi Hernandez.

Për reprezentuesin kosovar ky është një vlerësim jashtëzakonisht i lartë që është përfshirë në formacionin e Luis Enriques, përkundër që është vetëm një lojë, shkruan Telegrafi.

Gjithsesi trajneri spanjoll ka vlerësuar paraqitjet fantastike të Vedatit me Mallorcan duke e marrë në ‘Fantasy La Liga’.

Marca ka shkruar se Luis Enrique është një ekspert në këtë lojë pasi deri më tani ka grumbulluar 928 pikë në vetëm 14 ditë.

 

Mediat serbe kanë filluar ta shqetësojnë Granit Xhakën në konferenca për shtyp

Australia në epërsi minimale ndaj Tunizisë pas 45 minutave të para