Lazio fiton me rezultat të thellë, Muriqi titullar dhe shënon njërin nga 10 golat e kryeqytetasve

Maurizio Sarri ka debutuar me një fitore të thellë si trajner i Lazios.

Sigurisht, bëhej fjalë për një ndeshje miqësore ndaj një ekipi amator të lokalitetit ku po kryen fazën përgatitore, Top 11 Radio Club 103, por gjithsesi ishte një mundësi e mirë për të vënë minuta në këmbët e lojtarëve.

Ndeshja u mbyll me shifrat 10-0 për skuadrën e Lazios, e ku titullarë ishin tre futbollistë shqiptarë.

Në portë, luajti nga minuta e parë Thomas Strakosha, i cili duket se mund të rifitojë vendin e tij kundrejt Pepe Reinas pasi Sarri ka premtuar se do të kenë shanse të barabarta.

Në mbrojtje sigurisht që kishte hapësirë për Elseid Hysajn, i cili ishte një nga lojtarët që u afruan me kërkesë të trajnerit i cili e ka drejtuar edhe te Empoli e Napoli.

Ndërsa në sulm, Sarri e nisi me Vedat Muriqin nga minuta e parë.

Zgjedhjet diktoheshin edhe nga mungesat e lojtarëve të impenjuar me përfaqësueset e tyre në aktivitetet ndërkombëtare, por gjithsesi ishte një mundësi e mirë për lojtarët shqiptarë që të tregonin se sa vlenin para trajnerit.

Kjo ishte një mundësi e mirë sidomos për Muriqin, i mbrojtur me zell nga trajneri dje para tifozëve të cilëve u kujtoi që të mos e kontestonin dhe sulmuesi u përgjigj duke shënuar një nga golat në këtë duel. /Gazeta Olle/

Shënoi gol në miqësore me Chelsean, kampionët e Evropës e shpërblejnë Armando Brojën

Përgjime të reja publikohen në Spanjë: Perez tregon se si Mourinho e detyroi Ozilin ta lë të dashurën nga Italia