Dy ndeshjet e kthimit gjysmëfinale të Kupës së Kosovës ishin paraparë të zhvillohen nesër (e mërkurë) nga ora 15:00, por duelet kthyese janë shtyer për një javë.
Gjysmëfinalja e parë mes Dritës dhe Prishtinës si dhe ndeshja tjetër mes Ballkanit dhe Suharekës do të zhvillohen më 24 prill.
Lajmin e ka bërë të ditur Federata e Futbollit të Kosovës përmes rrjeteve sociale.
Ky vendim vjen për shkak se nesër është shpallur Ditë Zie nga presidentja e Kosovës, Vjosa Osmani.
Njoftimi i plotë nga FFK:
Shtyhen ndeshjet kthyese të gjysmëfinales së Kupës së Kosovës.
Pas vendimit të Presidentes së Rebpulikës së Kosovës, Josa Osmani, që dita e mërkurë, 17 prill 2024, të shpallet ditë zie, në kujtim të grave dhe vajzave të vrara në Kosovë si rezultat i dhunës në baza gjinore, Komisioni i Garave ka vendosur të shtyjë ndeshje e parapara me këtë datë.
Kësisoj, ndeshjet e kthimit gjysmëfinale të Kupës së Kosovës do të zhvillohen më 24 prill, 2024. /Gazeta Olle/
