Kosova pëson rënie në ranklistën e re të FIFA-s pas ndeshjeve të marsit

Kombëtarja e Kosovës në futboll ka pësuar rënje për tri pozita në renditjen e re të FIFA-s, e publikuar sot.

Kosova nga pozita e 117-t, bie në pozitën e 120 në renditjen e re që u publikua të mërkurën. Në muajin mars, “dardanët” zhvilluan tri ndeshje, një miqësore e dy kualifikuese të Botërorit të vitit të ardhshëm.

Miqësoren ndaj Lituanisë, Kosova e fitoi me rezultat të bindshëm 4:0 në Prishtinë më 24 mars. Katër ditë më vonë, Kosova e nisi me humbje rrugëtimin kualifikues të eliminatoreve për Botërorit “Katari 2022”. “Dardanët” u mposhtën 3:0 nga Suedia në stadiumin “Fadil Vokrri”.

Më 31 mars, Kosova pësoi disfatë edhe në duelin e dytë kualifikues për Botëror në udhëtim nga Spanja, 3:1. Golin e vetëm për Kosovën e realizoi Besar Halimi në minutën e 70-të.

Shqipëria ndërkohë mbetet në pozitën e 66-të, e cila i zhvilloi tri ballafaqime po ashtu. Fitoi në udhëtim tek Andorra 1:0 më 25 mars. Më 28 mars humbi në stadiumin “Air Albania” në Tiranë nga Anglia 2:0, ndërsa fitoi në udhëtim ndaj San Marinos 2:0, më 31 mars.