Kosova nesër nga ora 20:45 do të ballafaqohet me Gjeorgjinë në stadiumin ”Fadil Vokri” në Prishtinë, ndeshje kjo e vlefshme për kualifikimet për në Kampionatin Botëror ”Katar 2022”.
Dy ditë më parë kryetari i grupit të tifozëve ”Dardanët” iu bëri thirrje Ministrisë së Shëndetësisë dhe asaj për Kulturë, Rini dhe Sport që të bëjnë hapjen e stadiumit ”Fadil Vokrri” në 100 % të kapacitetit me arsyetimin se kjo është ndeshja e fundit për Kosovën si vendas në këtë vit kalendarik. Për më tepër ai kishte përmendur faktin se tashmë numri i rasteve me Covid-19 është zvogëluar dhe se janë të gatshëm t’i respektojnë të gjitha masat.
Por, kërkesa e ”Dardanëve” nuk do të plotësohet sepse do të lejohet shfrytëzimi i vetëm 30 % të stadiumit edhe në përballjen me Gjeorgjinë.
Zëvendësministrja e Ministrisë së Kulturës, Rinisë dhe Sportit Daulina Osmani, ka thënë se ndeshja do të zhvillohet sipas masave që janë aktualisht në fuqi dhe se që në hyrje të atyre do t’iu kërkohet dëshmia e vaksinimit ose testit negativ.
”Ndeshja do të zhvillohet sipas masave aktuale, do të thotë 30 përqind e kapacitetit të stadiumit. Në hyrje shikuesve do t’iu kërkohen dëshmitë e vaksinimit ose testit negativ”, ka thënë Osmani.
Ajo po ashtu u ka bërë thirrje tifozëve që t’i ruajnë biletat sepse pas ndeshjes do t’iu nevojiten si dëshmi për të lëvizur edhe pas orës policore.
