Boksieri i njohur kosovar Haxhi (Robin) Krasniqi do të ngjitet sërish në ring më 4 maj. Ai në Augsburg të Gjermanisë do ta ketë përballë portugezin Jorge Silva.
Për Krasniqin do të jetë meçi i 61-të në boksin profesionist dhe i pari që nga fitorja në Prishtinë ndaj Nadjib Mohammedit në gusht të vitit të kaluar, meç që ngjalli shumë reagime.
Krasniqi në boksin profesionist ka 53 fitore e shtatë humbje, ndërsa kundërshtari i radhës Silva i ka 22 fitore e nëntë humbje.
“Jam shumë i lumtur, që përballja ime e radhës do të jetë në Augsburg. Unë jetoj në Gersthofen tash e disa vite dhe ndihem shumë mirë. Është një ndeshje në shtëpi për mua, por edhe një përgjegjësi e madhe, që tifozëve të mi t’u ofrojë atë që presin gjithmonë nga unë – një luftë të fortë dhe nga e cila largohem si fitues”, ka thënë Krasniqi.
Krasniqi zë vendin e shtatë në renditjen botërore të versionit WBC në kategorinë gjysmë të rëndë.
