Boksierja kosovare, Donjeta Sadiku, e ka fituar meçin e parë në turneun ndërkombëtar “Strangja” që po mbahet në Sofje të Bullgarisë.
Donjeta boksoi të hënën në kategorinë deri 60 kilogramë, ndërsa e mposhti garuesen nga Mongolia Namuun Monkhor.
Në kategorinë e lehtë (60 kg) janë 15 boksiere. Donjeta vazhdon garimin në çerekfinale.
Turneu në Bullgari shërben si përgatitje për turneun kualifikues botëror për Lojërat Olimpike “Parisi 2024” që mbahet prej 29 shkurtit deri më 12 mars në Busto Arsizio të Italisë.
Kosova ende nuk ka normë olimpike në sportin e boksit. Gjasat më të mëdha vlerësohet se i kanë Donjeta Sadiku dhe Shpëtim Bajoku. Turneu i dytë dhe i fundit kualifikues për Lojërat Olimpike mbahet prej 23 majit deri më 3 qershor në Bangkok të Tajlandës. /Gazeta Olle/