Skitarja e kërcimeve me ski, Sophie Sorschag, tani e tutje mund të garojë për Kosovën.
Sorschag, që në janar të këtij viti vendosi të lë Austrinë dhe do të garojë për Kosovën në garat ndërkombëtare, për këtë është dashur të pres rreth dhjetë muaj për të marrë dritën e gjelbërt nga Federata Ndërkombëtare e Skive (FIS), të cilët tanimë kanë vendosur flamurin e Kosovës, tek profili zyrtar i Sorschagut.
Deri tek konfirmimi i FIS-it, është dashur një punë e gjatë insistimesh dhe kërkesash, të bëra nga drejtuesit e KOK-ut, presidentit Ismet Krasniqi e sekretarit të përgjithshëm, Besim Aliti, si dhe kryetari i FSK-së, Milaim Kelmendi. Kelmendi, që është edhe nënpresident i KOK-ut, shtoi se tani e tutje presin që 24-vjeçarja të përfaqësojë denjësisht Kosovën në garat e rëndësishme ndërkombëtare.
Sophie Sorschag ka një bagazh të madh në kërcimet me ski. Ajo u shpall kampione e botës në garat ekipore me Austrinë në vitin 2021, ndërsa mori pjesë në Lojërat Olimpike Dimërore Pekini 2022. Karriera dhe potenciali i saj japin shpresa për medalje historike për Kosovën në sportet dimërore, pse jo edhe në Lojërat Olimpike Dimërore Milano Kortina 2026. /Gazeta Olle/
