Rrahmani flet për rikthimin nga lëndimi, ka një premtim për tifozët kosovarë

Albion Rrahmani është rikthyer në stërvitjet individuale pas lëndimit që kishte pësuar javë më parë me fanellën e Përfaqësueses së Kosovës.

Ish-anëtari i Ballkanit tani është pjesë e gjigantit rumun Rapid Bukuresht, derisa ka dhënë një intervistë për faqen zyrtare të klubit.

Sulmuesi llapjan ka thënë se rikuperimi është duke shkuar shumë mirë, derisa ka njoftuar edhe për kohën e rikthimit në fushat e blerta.

“Rikuperimi po shkon shumë mirë dhe jam shumë i lumtur për veten time, për procesin e rikuperimit dhe shpresoj të kthehem sa më shpejt në fushë. Të gjithë ata që më kanë parë, doktori, fizioterapeuti, kanë thënë se do të jem i gatshëm për rifillimin e kampionatit në dimër, kështu që mezi pres të kthehem dhe të luaj në ndeshjen e parë në janar dhe dua që gjërat të ndodhin kështu. Javën tjetër do të shkoj për një kontroll dhe pas kësaj do të filloj të vrapoj dhe patjetër do të jem gati të luaj në janar nëse gjërat shkojnë sipas planit”, ka deklaruar Rrahmani.

Tutje sulmuesi kosovar tha se shpreson që të jetë i gatshëm 100 për qind për fazën përgatitore që do ta zhvilloj skuadra e tij në dimër.

“Shpresoj se do të jem 100 për qind i aftë për kampin stërvitor dimëror. Nëse gjithçka është në rregull në kontrollin tjetër, unë do të filloj të vrapoj dhe deri në momentin që të nisemi për në kampin stërvitor, gjithçka duhet të jetë mirë për të qenë në formë”.

23-vjeçari foli edhe për vështirësitë që po ka të jetë jashtë fushave të blerta.

“Ishte shumë e vështirë. Sa herë doja të isha me ta në stërvitje, në ndeshje, në fushë. Ky është futbolli dhe ne duhet t’i pranojmë gjërat që na ndodhin dhe t’i marrim ashtu siç janë. Shpresoj që ky të jetë lëndimi i fundit për mua dhe për çdo lojtar, sepse periudha e dëmtimit është shumë e vështirë çdo herë. Shpresoj të jemi të gjithë të shëndetshëm dhe të fortë”, vazhdoi Rrahmani.

Rapidi është duke kaluar një moment shumë të mirë, derisa Rrahmani foli edhe për formën e skuadrës së tij.

“Është shumë e rëndësishme të qëndrojmë të pamposhtur. Djemtë kanë arritur të marrin vetëm fitore ose barazime, jam shumë i lumtur për këtë dhe shpresoj se mund t’i mbajmë gjëra të tilla deri në fund të sezonit. Nga janari do të jemi të gjithë në formë: unë, Petrila, Emmers dhe do të shtyjmë veten për të arritur qëllimin tonë: fitimin e kampionatit”.

Rrahmani foli tutje edhe për ndeshjet me Përfaqësuesen e Kosovës, duke thënë se i vije keq që nuk u kualifikuan në Euro 2024, por qëllimi është të shkoj me Dardanët në Kampionatin Botëror të vitit 2026.

“Na vjen keq që nuk u kualifikuam në EURO. Është një gjë e keqe për të gjithë. Për lojtarët, për tifozët, por ky është futbolli. Duhet të qëndrojmë të përulur, të punojmë shumë për ndeshjet e radhës, po përgatitemi për Botërorin dhe shpresojmë të kualifikohemi në këtë kompeticion”.

“Ne jemi një ekip shumë i mirë, vetëm duhet të mbajmë qëndrimin tonë dhe të punojmë shumë, dhe një ditë do të kualifikohemi, ky është një premtim që ua bëj të gjithë tifozëve në Kosovë. Një ditë, ëndrra do të bëhet realitet”, theksoi Rrahmani.

Ndër të tjera Rrahmani foli edhe për kalimin e tij te Rapid Bukureshti nga kampionati kosovar, derisa thotë se ka përkrahje nga tifozët e Kosovës.

“Tifozët nga Kosova më mbështetën kur zgjodha të vij në Rapid. Ata i shikojnë ndeshjet tona dhe ende më mbështesin, i shoh gjithmonë në komentet e postimeve të klubit. E morën shumë mirë këtë lajm dhe thanë se po bëj hapin më të mirë për karrierën time. Për mua është shumë e rëndësishme të kem mbështetjen e tyre dhe të dëgjoj këto fjalë. Jam shumë i lumtur që jam këtu dhe dua të luaj sa më shpejt që të mund të vazhdoj atë që kam filluar”.

Si duket një ditë e jetës së Albion Rrahmanit dhe çfarë bën ai në kohën e lirë?

“Ndonjëherë zgjohem në 7, ndonjëherë në 8, në varësi të fizioterapisë ose stërvitjes. Zgjohem dhe shkoj direkt për të bërë dush. Unë ha mëngjes në 8. Zakonisht ha vezë, qumësht dhe përgatitem për të ardhur në stërvitje. Më duhet të ha në mëngjes para stërvitjes”, tregoi Rrahmani.

“Shikoj filma, kaloj kohë me babin tim, ndonjëherë luaj PlayStation ose luaj CS:GO. Ditët e mia jashtë stërvitjes janë pak a shumë të tilla: luaj lojëra, shikoj filma dhe sigurisht shikoj lojëra. Çdo ditë kam ndjekur të gjitha ndeshjet kualifikuese të EURO. Tani që pushimi konkurrues ka përfunduar, skuadra jonë ka një lojë të hënën dhe mezi pres të shkoj në stadium, të shikoj ndeshjen dhe shpresoj të marr tre pikët në fund”.

Në fund të intervistës, Albion Rrahamani u dërgoi një mesazh mbështetësve të Rapidit.

“Faleminderit shumë për mbështetjen që më jepni. Do të rikthehem shumë shpejt në fushë dhe do të jap 100% në çdo ndeshje. Ju premtoj se një trofe do të vijë te Giulesti! Eja shpejt!”, tha Rrahmani. /Gazeta Olle/ 

Sezoni i ri, por Mervan Bejtullahu mbetet ai i vjetri me gabime skandaloze dhe tendencioze

Van Basteni: Goli i anuluar i Amir Rrahmanit është për të qarë, nuk është e drejtë