ZYRTARE: Anel Rashkaj prezantohet tek Prishtina (FOTO)

Edhe zyrtarisht Anel Rashkaj është bërë pjesë e Vala Superligës, përkatësisht klubit më të madh në vend, Prishtinës.

Mesfushori i Përfaqësueses së Kosovës, ka lënë elitën e futbollit suedez për klubin bardhekaltër.

Ai së fundi luajti me Eskulstuna në Suedi, derisa sot nënshkroi kontratë dy-vjeçare me Prishtinën.

“Prej kohës së fundit që isha me Përfaqësuesen në Prishtinë, kemi rënë në kontakt me Prishtinën, kryetarin Remzi Ejupi e pastaj edhe me kryetrajnerin Arsim Thaqi dhe anëtarë tjerë të bordit. Pastaj mblodha informacione se si është gjendja e futbollit këtu. Pas kthimit në Suedi dhe pasi që kisha një pasqyrë të gjendjes këtu për gjithçka bisedova gjatë me familjen se si do të veproja. Në fund vendosa të kthehesha në Kosovë. Por, kisha edhe obligim të flisja me klub, sepse kisha edhe një vjet e gjysmë kontratë. Aspak s’ka qenë vendim i lehtë, por në anën tjetër ishte vendim që e prisja shumë gjatë, sepse ka dhjetë vite që jam në futbollin skandinav. Unë jam rritur në Kosovë dhe normalisht që vendi yt të tërheq, dhe po ashtu dy fëmijët që i kam, doja të kem stabilitet më të gjatë familjar. Pra, për këto arsye Kosova do të ishte vendi më i mirë për mua”, ka thënë ai për Prishtinafc.com, raporton Gazeta Olle.

rashkaj

Tutje, Rashkaj shtoi se arsyeja pse zgjodhi Prishtinën, është se klubi kryeqytetas është më i madhi në Kosovë.

“Prishtina është klubi më i madh në Kosovë dhe të gjithë lojtarët më të mirë në vend dëshirojnë të luajnë këtu. Prishtina ka emër dhe është klubi me historinë më të gjatë dhe klubi më i madh në vend”, shtoi ai.

“Do të mundohem të jap maksimumin dhe të sjellë profesionalizmin dhe kualitetin nga Skandinavia. Ajo që mund të premtoj është të jem sa më profesional dhe të jap maksimumin që t’i arrijmë objektivat. E di që shpesh klubet flasin për tituj, por mendoj se në rend të parë duhet të jetë puna dhe të nxirret maksimumi i saj, e pastaj rezultatet vijnë dhe janë produkt i punës. Lojtari duhet të jetë profesional në çdo rast, e pastaj nuk besoj se do të mungoj edhe rezultati”, ka thënë, Anel Rashkaj në fund.

rashkaj2