Suspendon ambulanca, a ndërroi jetë ky futbollist për këtë arsye

Një hetim për vdekjen e mesfushorit të Dinamo Bukureshtit, Patrick Ekeng, ka zbuluar se kompania e ambulancës që e ka dërguar kamerunasin në spital kishte pajisje me të meta dhe ilaçe me datë të skaduar në disa nga veturat e saj, ka njoftuar Ministria e Brendshme e Rumanisë.

Reprezentuesi i Kamerunit, Ekeng 26-vjeçar, kolapsoi në fushë disa minuta pasi u fut nga banka rezervë në minutën e 62-të, në ndeshjen e së premtes kundër Viitorul Constantas. Ai u shpall i vdekur dy orë pas incidentit, ndërsa dyshohet se kishte pësuar sulm në zemër, shkruan Reuters.

Pas vdekjes, Unioni Botëror i Futbollistëve Profesionistë (FIFPro) ka ngritur brengën për nivelin e ulët të tretmanit të ndihmës së parë për futbollistët në Rumani, duke thënë se është e qartë se disa klube rumune kanë histori për të pajisur keq infrastrukturën mjekësore.

Ministria e Brendshme e Rumanisë ia ka suspenduar licencën kompanisë private të ambulancave “Puls”.