Presidenti Ademi pret në zyre vëllezërit Muriqi, Sahit Kelmendin dhe Skënder Shëngylin

Fadil dhe Xhevdet Muriqi, Sahit Kelmendi dhe Skënder Shëngyli, katër legjendat e futbollit kosovar, kanë qëndruar sot në zyret e FFK’së.

Atyre ‘konak’ u bëri presidenti i federatës, Agim Ademi, i cili i njoftoi për ecurinë e federatës dhe futbollit kosovar, shkruan Gazeta Olle.

Sipas njoftimit të FFK’së, puna e menaxhmentit të federatës u vlerësua lartë nga mysafirët.

Njoftimi i plotë:

“Presidenti Agim Ademi  dhe sekretari i përgjithshëm Eroll Salihu, kanë pritur sot në selinë e FFK-së vëllezërit Fadil e Xhevdet Muriqi. Në këtë takim ishin të pranishëm edhe dy ish-bashkëlojtarët e tyre të gjeneratës së artë të Prishtinës, Skënder Shengyli dhe Sahit Kelmendi. Gjatë këtij takimi Fadil Muriqi, i cili jeton dhe vepron në Australi, i përgëzoi drejtuesit e FFK-së për sukseset e arritura deri më tash, derisa theksoi se rezultatet dhe paraqitjet e Kombëtares së Kosovës po na bëjnë krenarë të gjithëve, ashtu sikurse në vitet e 80-ta kur Prishtina ishte shndërruar në simbol të tërë popullit shqiptar.

Ata uruan që edhe më tutje të vazhdojë ecuria e mbarë e rezultateve të Kombëtares, por edhe puna e mirëfilltë që po bëhet në organizimin sa më të mirë të FFK-së, përmirësimin e infrastrukturës dhe ngritjen e cilësisë së futbollit në kampionatin vendor. Ndërkohë, presidenti Ademi i njoftoi legjendat e futbollit kosovarë për strategjinë e FFK-së dhe projektet që janë realizuar dhe do të realizohen në të ardhmen me qëllim të zhvillimit të mëtutjeshëm të futbollit të Kosovës. Në fund u ndanë dhurata modeste për mysafirët.”/Gazeta Olle/