Panucci shpall listën për ndeshjet zyrtare me Turqinë dhe Andorrën

Trajneri i Kombëtares shqiptare Christian Panucci ka publikuar ditën e sotme listën e lojtarëve të grumbulluar për dy ndeshjet e para kualifikuese për Euro 2020, respektivisht ndaj Turqisë më 22 Mars në Loro Boriçi dhe Andorrës më 25 Mars në Estadi Nacional, njofton FSHF, shkruan Gazeta Olle.

Trajneri Panucci do të dalë përpara mediave në një konferencë për shtyp ditën e diel, në orën 11:00, në selinë e FSHF-së, siç edhe është parashikuar.

Grumbullimi i ekipit kombëtar do të nisë ditën e dielë në Kompleksin Tropikal, ndërkohë që seanca e parë stërvitore do të jetë në orën 15:00 në fushën sportive të Tropikal.

Ndërkohë, sipas programit mediatik për ekipin kombëtar A, për tre ditë me radhë, të hënën, të martën dhe të mërkurën, në orën 13.30 do të jenë përpara mediave dy futbollistë të ekipit kombëtar, teksa të enjten, një ditë përpara ndeshjes me Turqinë, në stadiumin “Loro Boriçi”, në orën 17:00, do të zhvillohet konferenca për shtyp me trajnerin e ekipit kombëtar dhe kapitenin.