Kroacia në çerekfinale, mposht me penallti Danimarkën

Kroacia ka siguruar kualifikimin për në çerekfinale të Kupës së Botës.

Në Nizhny Novgorod, Kombëtarja e Kroacisë ka arritur të mposht Danimarkën pas ekzekutimit të penalltive me rezultat 3:2, pasi koha e rregullt përfundoi barazim 1:1.

Fillimi i ndeshjes na bëri të kuptojmë se përballja mes Kroacisë dhe Danimarkës do të dhurojë shumë gola.

Kjo pasi deri në minutën e katërt të ndeshjes, të dy kombëtaret arritën të realizojnë nga një herë.

Ishte Danimarka që në minutën e 1’ gjeti rrjetën përmes Jorgensen, për 1:0.

E shpejtë ka qenë përgjigja e Kroacisë, që ka barazuar në 1:1 me anë të Mandzukic në minutën e katërt të ndeshjes.

Por e kundërta ndodhi në vazhdimin e ndeshjes, ku të dy skuadrat lojën e përqendruan në mesfushë, pa arritur të gjejnë golin, e po ashtu duke dështuar edhe të krijojnë raste të mira shënimi.

Rezultati 1:1 dërgoi ndeshjen në vazhdime.

Në pjesën e dytë të vazhdimeve, Kroacia pati mundësi të artë të shënonte golin e fitores, kur Rebic fitoi penallti në minutën e 116.

Këtë mundësi nuk e shfrytëzoi Modric, që nuk arriti të mposht Kasper Schmeichelin nga pika e bardhë.

Edhe çerekfinalisti i kësaj përballje, u përcaktua me penallti, ku Kroacia arriti të fitojë me rezultat 3:2.